23 Июля 2017. Неделя 7-я по Пятидесятнице

Положение ризы Господа нашего Иисуса Христа в Москве. Преподобного Антония Печерского

К римлянам послание апостола Павла

1 Должни есмы мы сильнии немощи немощных носити, и не себе угождати:
2 кииждо же вас ближнему да угождает во благое к созиданию.
3 Ибо и Христос не себе угоди, но якоже есть писано: поношения поносящих тебе нападоша на мя.
4 Елика бо преднаписана быша, в наше наказание преднаписашася, да терпением и утешением писаний упование имамы.
5 Бог же терпения и утешения да даст вам тожде мудрствовати друг ко другу о Христе Иисусе,
6 да единодушно едиными усты славите Бога и Отца Господа нашего Иисуса Христа.
7 Темже приемлите друг друга, якоже и Христос прият вас во славу Божию.

1-е послание к коринфянам апостола Павла

18 Слово бо крестное погибающым убо юродство есть, а спасаемым нам сила Божия есть.
19 Писано бо есть: погублю премудрость премудрых, и разум разумных отвергу.
20 Где премудр? где книжник? где совопросник века сего? Не обуи ли Бог премудрость мира сего?
21 Понеже бо в премудрости Божией не разуме мир премудростию Бога, благоизволил Бог буйстовм проповеди спасти верующих.
22 Понеже и иудее знамения просят, и еллини премудрости ищут:
23 мы же проповедуем Христа распята, иудеем убо соблазн, еллином же безумие,
24 самем же званным иудеем же и еллином Христа, Божию силу и Божию премудрость

К галатам послание апостола Павла

22 Плод же духовный есть любы, радость, мир, долготерпение, благость, милосердие, вера,
23 кротость, воздержание: на таковых несть закона.
24 А иже Христовы суть, плоть распяша со страстьми и похотьми.
25 Аще живем духом, духом и да ходим.
26 Не бываим тщеславни, друг друга раздражающе, друг другу завидяще.

Евангелие от Матфея

27 И преходящу оттуду Иисусови, по нем идоста два слепца, зовуща и глаголюща: помилуй ны, (Иисусе) Сыне давидов.
28 Пришедшу же ему в дом, приступиста к нему слепца, и глагола има Иисус: веруета ли, яко могу сие сотворити? Глаголаста ему: ей, Господи.
29 Тогда прикоснуся очию их, глаголя: по вере ваю буди вама.
30 И отверзостася очи има: и запрети има Иисус, глаголя: блюдита, да никтоже увесть.
31 Она же изшедша прослависта его по всей земли той.
32 Тема же исходящема, се, приведоша к нему человека нема беснуема.
33 И изгнану бесу, проглагола немый. И дивишася народи, глаголюще, яко николиже явися тако во израили.
34 Фарисее же глаголаху: о князи бесовстем изгонит бесы.
35 И прохождаше Иисус грады вся и веси, учя на сонмищих их, и проповедая Евангелие Царствия, и целя всяк недуг и всяку язю в людех.

Запись опубликована в рубрике Календарь. Добавьте в закладки постоянную ссылку.